شعاع حياة

2010-06-13T07:56:00.000-07:00

الاتصال بنا

تمتلك شركة أبوظبي للإعلام وتدير تلفزيون أبوظبي، قناة أبوظبي الرياضية ، وقناة تلفزيون الإمارات، وإذاعة أبوظبي، وإذاعة إمارات أف أم، وإذاعة القرآن الكريم، وصوت الموسيقى، وجريدة الاتحاد، وجريدة
ذا ناشونال ، ومجلة زهرة الخليج، ومجلة سوبر، ومجلة ماجد، بالإضافة إلى أعمال أخرى مثل الشركة المتحدة للطباعة والنشر، و شركة إيميج نيشن للإنتاج السينمائي. يقع المقر الرئيسي للشركة في أبوظبي، كما أن لديها مكاتب في القاهرة ودبي وواشنطن العاصمة
.

أول الحياة نبض

2009-06-19T02:03:00.000-07:00

كما تسطع الشمس فتبث في الكون حياة .. اخترت أن أقصر كلماتي في جبهتين اثنتين .. كأني أتكلم وشعاع حياة .. لأن النبض الذي يغذي قلب نبض إنسان والذي يغذي نبضين نبض عشق ولا يمكن لنبض أن يغذي أكثر ويكون عادلا..

أبث هنا نبع من نهر حياتي .. أسطر شيئا مما دفعتني إليه الأيام وساقني إليه القدر .. أما عن أوراق وأسرار ومقهى الثرثرة فسأورد نصوصهن المقبولة نوعا ما مع تعديلات فيها بين شعاع حياة وكأني أتكلم ..

دائما لا يحلوا المقام إلا بكم ولا تزهو الكلمات الا برونق عطركم .. فكحلوا عيونك برؤية حروفي .. وأبهجوا روحي بحروف نقدكم ..

جائتني هذه الردود

2009-03-24T01:54:00.001-07:00

السادة فريق العمل وأسرة تحرير مجلة رؤية..

هنا في صندوق التعليقات على هذا البوست اتركوا ردودكم التي انتظرها ..

أتمنى أن تكون كما أرجوا..

شاكرا لكم حسن تعاونكم وأسأل الله أن نبني هذه المجلة كلنا سويا..

خالص تحياتي..

كاتب مصري

بوح قلب(خاطرة لم تكتمل)

2009-02-17T07:25:00.001-08:00

ما أشعره اليوم لا تصفه كلمات ولا يكتبه قلم ربما لأنها أعذب أيام العمر الذي عشته وأصعبها في ذات الوقت.. أعذبها إحساسا وهدوءا وحيوية ..وأصعبها ألما وخوفا ورهبة..الخوف من القادم وما تحمله طيات الغيب ، الألم في البعد والقرب بعد الكيان واقتراب الروح.. والرهبة التي تصاحبني منذ عرفت الفراق..

سطور حياتي لا يمكن أن أجد بينها يوما مر بلا ألم أو دمع .. لا أتكلم عن روح نشأت في بؤرة عذاب وبيئة اضطهاد إنما لأنه القدر الذي كتب على قلبي..أن أكون عاطفيا بشدة ..إحساسي ليس دونا عن خلق الله كلهم لكنني واحد ممن أنعم الله عليهم برقة الإحساس ودفئه وهذه هي نقطة ضعفي.. أيا كان الأمر..

لا أستطيع أن أعيش بعيدا عن الحب.. لا بد أن أشعر بقلب يحتويني ..يخشى علي..أكون له كل ما له ..

غزة الأبية..نحن معكم ولن ننساكم

2009-01-07T14:03:00.000-08:00

ليس عجيبا أن نرى هذا السكوت والخرس من الحكومات التي للأسف تلهج العربي وعار على العربية هم.. كارثة والله حلت بنا ..غزة الأخت الشقيقة لعالمنا الإسلامية ..احتضنت إدارتها مصر إلى عام خمسة وثمانين من القرن الماضي واليوم كأنها تتبرأ منها بل هي فعلا تفعل هذا..واحسرة عليكم أيها الخونة العملاء ..جناح إسرائيل بيننا وسيفهم علينا..أخ منكم يا حكاما لسانكم هي اسرائيل..متى وكيف كانت فينزويلا من جلدتنا أو من دمنا ومع ذلك انتفضت لما يحدث في غزة الأبية وطردت ذاك الخنزير سفير الملاعين.. وحكامنا مازالوا يحتضنون سفراء الحقيرة اسرائيل بين أحضان بلادهم.. أو يعقل هذا..قسما بربي إنها المهانة والذلة والعار.. حقا لقد هزمونا في نفوسنا سيطروا على حكامنا..واخيبتاه ويا حسرة على أمة باعة نفسها للعدو بأبخس الأثمان..

غاز يصدر لهم وأمم تقف معهم وحكامنا للأسف يدعمونهم ..تركوا حماس وحدها تقف في صف المقاومة وهم بلسانهم معها بأجسادهم وكيانهم وأفعالهم مع اسرائيل ..حسبنا الله ونعم الوكيل.. ربنا لا تؤاخذنا بما فعل السفهاء منا..

لكنكم أيها الشعب المناضل لستم وحدكم وربي لستم وحدكم..معكم نحن بقلوبنا وأموالنا وأرواحنا..معكم ولن ننساكم يا أبطال غزة وشهداءها.. أهل صنعاء اليمن معكم يطالبون بفتح باب الجهاد يحترقون ألما من حالكم.. رجال مصر الشرفاء من شعبها الذي رآى اللعنة الإسرائيلية قبل ذلك معم ولن يتركوكم وحدكم أبدا..تركيا التي أرتنا موقفا قويا كلها بشعبها وحكومتها معكم إلا بعض الخونة والأعوان.. حزب الله معكم يتحدى العالم كله ويعلن استعداده امعاداة كل من يصاحب إسرائيل من أجلكم بل ويعلنها قوية عالية أنه مستعد للتدخل العسكري في أي وقت..

لن ننتظر حتى تحترق غزة أكثر وأكثر قسما بربي إنا قادمون ..يوما ما وقد اقترب هذا اليوم واقتربت ساعة الصفر من دق أجراسها..فقد احتدم الوضع في الشارع الإسلامي وحتى غير الإسلامي ممن لهم قلوب ويعرفون حق الإنسانية.. لن نعترف بإسرائيل..والله لو وضعوا الشمس في أيماننا والقمر في شمائلنا على أن نعترف بهم والله لا نفعل.. وهذا حديث بلساني على لسان كل غيور ومسلم ومجاهد نحن معكم ولن ننساكم.. لن نعترف بإسرائيل ابدا..نحن معك يا هنية الخير ويا مشعل الحق..معكم نحن نساندكم ونقف في ظهوركم.. أعلنها عالية بلساني سنصنع المستحيل من أجل أن تكونوا أحرارا لا محاصرين ..لن يكون لهم الفوز أبدا ..لأن يتركم الله أعمالكم وسينصركم على عدوكم..

من مكاني هذا أدعوا كل من له قلب أو ألق السمع وهو شهيد أن يشارك في الدفاع عن غزة وأهلها .. لكل من يحمل أمانة الكلمة في عنقه سنسأل يوم القيامة ما فعلنا لهم فلنتكلم لنعلنها عالية ولنخبر الناس جميعا بالمخطط الصهيوني للقضاء على حماس الأبية الصامدة الصابرة ومن بعدها الإبادة العامة لأهل الأقصى وفلسطين.. وقد بدؤوا حملتهم فلنتحرك فقد ذهب الوقت ومضى الكثير ونحن كما الأخرس الأبكم الذي لا يقدر على أمره..

إن كان حكامنا خذلوكم فنحن معكم ولن ننساكم.. والله قبلنا معكم وسينصركم عاجلا بإذنه تعالى..

اصبروا أهل غزة الأبية..صبرا آل غزة فإن موعدكم الجنة..

أحلام وهواجس2008/2009

2009-01-06T02:11:00.001-08:00

كنت عاوز أكتب البوست ده على مدونتي الرئيسية كإني أتكلم بسحسيت انه محتاج فضفضة بالعامي فطبعا قلت يبقى هنا خاصة كمان إنه كله أسرار ودي هيا بئر أسراري المكشوف..

2008سنة بدأت وحياتي اختلفت تماما..ألحق يتقال حياتي مختلفة من قبلها بشهر و13يوم بالضبط..من يوم 17/11/2007 يوم لما دخلت مصر..عشت عمري كله في السعودية..ودي تاني مرة آجي فيها مصر..بس مش هسيبها تاني .. بعد لما امتحانات الفصل الأول خلصت كنا في شهر يناير.. طلعت مع جماعة اصحابي رحلة للقاهرة أصل أنا من المنصورة عروس نيل مصر العظيمة .. فاكر تفاصيل الرحلة دي وكل تفاصيل السنة دي كلها..كإنها والله إمبارح أول مرة سنة تعلم في حياتي كده وأفضل فاكرها قوي..رحنا فين ياربي.. اه أول حاجة الأهرام..ذلك الخيال الذي لم أجد له تحليلا كيف قام بناءه هكذا طيلة هذه المدة.. المهم طبعا عارفين في ايه هناك..الأهرامات التلاتة وأبو الهول..يا ترى بس.. لأ والسياح كمان من المعالم الي هناك.. أنا لابس جاكت والجو مش حر يعني احنا في يناير..ودول أتاريهم بيجوا يشتوا هنا كأن الشتا بتاعنا بالنسبة لهم خريف أو ربيع..لابسين..لا بلاش كدب مش لابسين حاجة الا حجات خفيفة كده..تخلي الواحد يموت مكانه فعلا.. موقف من الي شفته ومقدرتش أكتم الضحك(معلش هقوله بأه) واحد ووحده أجانب طبعا وده نازل فيها بووووس للصبح وحالتهم حاله..مش هنا يابا يا عم مينفعش كده..وده دايب ع الآخر..المهم عسكري من الي هناك حاول يكلمه وينبهه بالفرانكوأراب وده حتى لو فهم خلاص هيا طلعت في دماغه..واحد رد عليه قاله يا عم سيبه يعيش اللحظة والله زي ما بقلكم كده.. وموقف عجبني جدا جدا جدا..رحت أنا وواحد صاحبي نرتاح من الف ده وقعدنا على كراسي هناك لقيت واحد بينا وبينها كرسين مثلا أجنبية بردو لافة الطرحة وبتصلي اه والله كان الظهر أدن..طبعا اتكسفت من نفسي تماما..ونهيت المهزلة الي هناك بإني انسحبت مع صاحبي ورحنا نصلي..

بعدين بأه رحنا فين..دريم بارك.. كنت بشوفها في التلفزيون بس..دلوقتي باه أنا فيها..أحمد بهجت وسنينه ايه ده ياعم ايه المساحة دي وايه ده كله..حاجة محترمة جدا جدا..بس طبعا فيها مناظر مش محترمة كتييييير جدا شفتبعنيا محدش قلي..ع المغرب كده قبل ما يقفلو بساعة يعني تقريبا أصلهم بينامو بدري..ههههههههه على ستة كده أمشي هنا وهناك ألاقي الي مأنججين في بعض بس مش بالإيد لا افهمومها بأه دول بأه مصرين كلا وجزأ والي شايلي وحدة والي والي.. عينات كتيييير ..

ملعبتش كتير فضلت أتمشى وأتفرج ع الناس..ركبت لعبة كده مش فاكر اسمها لفت بيا لفت كنت بجد هموت قلبي كان هيقف تطلع فجأ وتروح مرمية بيا مرة وحدة..نزلت مش عارف أقف ع الأرض قلت توبة..قبل ما نمشي ركبت عربيات التصادم..رحت عند لعبتهم الجديدة دسكافري.. طبعا معروفة قعدت هناك أتفرج باه وأسمع صويت وزعيق وبنات على ولاد كله بيزعق أصور وأضحك..ربنا معاكو..ده لو فرضا يعني واحد فك من عليه الي ماسكة في الكرسي ده يوصل اسكندرية حدف..بترمي جامد جدا.. وصلينا المغرب ومشينا..يومها كان نفسي أروح الأزهر والحسين بس قالوا بعدين مش وقته..روحنا بأه..طبعا كنت عالآخر..من الفرجة على خلق الله ..يالله الحمد لله.. مرة تانية أروح الحسين والأزهر.

محصلش أحداث كتير باه بعد كده مهمة..بقيت أخرج ألف في البلد..أمشي ع النيل البحر زي ما بيقولوا .. لحد لما بدأ الترم التاني..

طبعا عرفت زمايلي في الكلية..احم احم..أقصد زميلاتي..ماهي دفعتنا 350 بنت و31 ولد بس بالذمة ينفع ده..آداب بأه كلية الكعب العالي... مشمهمة فترة الكلية دي قوي يعني مكنتش بدق على حد ولا مع حد ومعملتش أي صداقة مع اي حد لابنت ولا ولد زمالة بس..

حبيت النت قوي..طبعا كنت بأقعد عليه كتييير جدا ..النت والمسجد والكلية وشوية أتمشى فيهم وخلص اليوم.. لحد لما جه يوم غير حياتي جدا جدا وقلبها 180درجة فاكره والله تاريخ وساعة..1/3/2008وقت المغرب.. كنت بأكتب على منتدى ..وحدة ردت على موضوع كنت كاتبة عنوانه(مأساتي مع الحب) هيا مصرية بس زي حلاتي أو زي ما كنت أنا في السعودية بتاخد الثانوية ومولودة هناك بردوه..من فين البنوته دي من الشرقية..كذا مرة علقتلي..شدتني بكلامها مع انه عادي..بعتلها رسالة خاصة مع إيميلي..لقيتها قبلت وضافتني عندها..نتكلم عادي يعني زي ما قلتلها.. يومين والتالت هو ده 1/3/2008 الي بحكي عنه ..حسيت بقلبي خلاص هيدخل الجهاز ويروحلها..فعلا والله معرفش ازاي..حبيتها قوي..يمكن الأول كنت مشدود لها جدا جدا ومتعلق بيها بس مع الأيام الحب اتعمق جدا جدا جدا جدا..لحد لما بقينا روح وحدة بجد..طبعا اتكلمنا صوت بس ده لما ارتحنا لبعض واتفتحت قدامي أبواب الجنة الدنيوية التسعة.. جمال وأدب ورقة..حنان وحب ودفا..خوفها عليا والتشابه الضخم الي بينا.. عشت معاها أحلى الأيام..كنت بتعذب عشان مش قادر أطولها..بس كنت بصبر نفسي..لحد لما جه شهر خمسه..عملت ليا امتحان رسبت فيه وكانت هتضيع من ايدي لولا لطف ربنا.. خناقة وبتاع كده..اترجاها وتعيط وتقولي مقدرش أسامحك..دقت أقسى ألوان العذاب ان الي بتحبني وبتموت فيا مجوحة مني وهتسيبني لإنها حاسة بخيانة وجرح مينفعش تغفره وأنا بموت في نفسي..أصالحها وأحلفلها بكل الأيمان ان دي غلطة وخلاص..الحمد لله ربنا ستر وعدت على خير بس مش خير قوي..مرجعتش ثقتها تمام فيا غير لما نزلوا مصر في الأجازة ورحتلهم البيت قابلت باباها ومامتها واتكلمنا طبعا..وبعد كده رحتلها كتير جدا..بس كنت بعمل شبه روميو وجوليت هههههههه بقف تحت البيت جمب شجرة كده وهيا في البكونة والموبايل على ودني.. بنتكلم صوت وصورة لها لكن أنا مش شايفها طبعا صوت بس.. حبيتها بحق ربنا كان نفسها أعمل المستحيل عشانها وهشان تكون ليا.. يالله بس الحمد لله ربنا مش بيجيب حاجة وحشة طبعا لسة أحداث السنة مخلصتش ولا حكايتي معها كده خلصت لسة احنا في شهر خمسة بعدل لما الخلاف هدي وارتحنا تاني..وعملت أنا المدونة دي ودخلت عالم التدوين.. أكمل بأه البوست الجاي عشان كده زهقتم مني وطولت قوي.. ادعولي عندي امتحانات والله ومع كده مش عارف أغيب عنكم ولا يوم..

احنا في غيبوبة

2009-01-06T01:26:00.000-08:00

أنا اخترت ان البوست ده يكون هنا على مقهى الثرثرة عشان أتكلم فيه براحتي بالعامية يعني .. شيئ غريب جدا الي لاحظته على بعض المدونات من يوم لما بدأت الحرب على غزة.. في ناس محترمة وبتحس بجد وبتحترم أمانة الكلمة وبتتكلم بالحق وتناصر أهل غزة وده الغالب الحمد لله ..لكن وبدون ذكر أسماء دخلت عند ناس أعوذ بالله..إلي ألاقيه بيشتم في حماس ويقول هما السبب والي يقول خليهم يحاربو لنفسهم مفيش بلد بتححر الا بإيد ولادها..طيب هما قالوا لأ يعني بس بردو احنا مسلمين وأي أرض تعلوها راية الإسلام يبقى هيا لنا ..ولا هو من يوم لما انتهت الخلافة والوحدة الإسلامية بأه كل واحد يارب نفسي ووطني وبس.. نسينا ان الأرض دي كانت كلها في يوم من الأيام تحت إمرة رجل واحد يحكمها من المدينة المنورة أيام الخلفاء الراشدين ومن دمشق أيام الأمويين ومن بغداد أيام العباسيين..إيه أياميها لما كان الأعداء بيفكروا مجرد تفكير للحرب ضد المسلمين مع عددهم وقوتهم مكانوش بيقدروا لإن المسلمين في مشارق الأرض ومغاربها كان متحدين صف واحد وكلمة وحدة..امتى بدأنا نتهزم ..واضحة جدا..لما اتقسم العالم الإسلامي أيام الأندلس ..ملوك الطوائف والدولة الفاطمية في مصر و..و..و مما يذكره التاريخ..

يعني بكل سهولة الرد على الي بيقول يحاربو لوحدهم بأه واضح جدا... مليون لوحدة ميعملش حاجة..لكن مليار و300مليون يعملوا والله..

حاجى تانية نرفزتني جدا.. بيقلك يعني هيا مصر كانت تعملهم ايه أكتر من كده..المعبر وفتحته والإغاثات ودخلت والجرحى وعدوا جم مصر ..سبحان الله كإنهم بيمنوا ع الناس بالي بيحصل كإن ده مش واجبنا اصلا وغصب عننا لازم نعمل كده وياريته تم على أحسن وجه..المعبر مغلق تماما دلوقتي.. لا وايه بيتهموا حماس انها عاوزة تاخد المعبر لحسابها هيا بس..والله العظيم ..هههه الناس دي بتتكلم من كل عقلها هما فايقين لإيه ولا ايه يا جماعة.. والكارثة بأه اننا معندناش غير الكلام وبس.. كلام وكلام..ويعني هما الحكام عملوا غير كده ع الأقل احنا مش بإدينا غير الدعاء والتبرع (الواجب الديني يعني الجهاد بالمال مش صدقة لأ ده حقهم أصلا) والمقاطعة لليهود والأمريكان..أم الي بيصدروا الغاز لإسرائيل والي من تحت الكرسي بيبوسوا الجزم ويلمعوها دول هما الي عليهم الدور الكبير..قال عاملين جلسة مع الأمم المتحدة مستنين قرار من الأمريكان الي هما أساس المجزرة دي قال عشان يوقفوا ضرب النار..اه بس الناس دي عجيبه صحيح زي القطة الي لقت عيالها في (بؤ) كلب راحت تترجاه يسيبهم أخدها معاهم..

واضربت غزة..لا دي ادكت دك ربنا العالم بيه..ربنا ينصر المقاومة ويعلي رايتهم ويسدد رميتهم ويعين ويقوي أي جهة تساعد وياريت بلاش يالي بتشتم في حماس وحزب الله تتكلم أصلا لإن كلامك ينم عن جهل مطبق .. فايقين احنا اللوقتي لشيعة وسنة أصلنا ..يا سيدي كلنا مسلمين لما نحل مشكلتنا مع اليهود والأمريكان نفوق للطوائف الي وسطنا بأه..عجيب والله حالنا ده..

محدش يحس ان الكلام موجه ليه..لا ده عام..اعتبروها نقط تاخدوا بيها وانتو بتكتبوا عن غزة لإننا هنتحاسب يوم القيامة عن كل كلمة..

تاج من شهرزاد

2008-10-07T16:30:00.001-07:00

التاج ده جالي من وحدة صاحبة مدونة غالية عليا جدا..شهرزاد .. مكدبش عليكم التاج ده كنت مستنيه من زمان على فكرة والحمد لله أهو جه..معلش لو كنت اتأخرت في الإجابة عليه بس أصلي كنت في رأس البر بصيف يوم كده ع الماشي ..أه بصيف شفتوا بعد لما الدراسة دخلت هناك الجو لطيف قوي لدرجة كبيرة هأحكيلكم عن اليوم ده في مدونة مقهى الثرثرة النهارده إن شاء الله بس خلينا اللوقتي في التاج الغالي جدا عليا.. أبدأ..

بدأت تدوين امتى ودخلت عالم التدوين إزاي؟

ليا مع التدوين حكاية أقولكم عليها.. مكنتش أعرف قبل لما آجي مصر يعني ايه مدونة ويعني ايه تدوين بس كنت اسمع أخويا يقول عندي مدونة وبأكتب فيها وكده كنت نفسي أعرف إيه الحكاية خاصة ‘ني بأعشق الكتابة بطريقة ونفسي حد يقرالي قوي..المهم لما جيت بأه قعدت أدعبس ع النت لحد لما وصلت لموقع اسمه مدونتي سجلت عليه وعملت مدونة اسمها إمبراطورية الوحدة وكنت بأكتب بإسم مستعار (إمبراطور الوحدة)لو بحثتم على جوجل هتلاقوها.. المهم كانت كتابتي فيها عن الحب والمشاعر وكده وحجات قديمة كاتبها من زمان.. بعد كده لفيت مواقع كتير وعملت مدونات أكثر بس مرتاحتش أبدا ولا استقريت في التدوين غير لما هل عليا شهر خمسة 2008وعرفت بلوجر أو بالأحرى عرفت أعمل مدونة عليه ومن يومها وانتوا شايفني هنا معاكم..

ايه انطباعك في البداية؟

أنا بأعتبر نفسي بدأت تدوين لما دخلت بلوجر لإني في المدونات التانية مكنتش بلاقي تفاعل ولا استجابة من الناس مواقع مدفونة ملهاش زوار زي بلوجر لكن لما كتبت على بلوجر ولقيت بأه تعليقات بتوصل لعشرة وكده ياااااه ع الفرحة الي لقيتها جوايا بقيت الف المدونات وأدعي الناس لمدونتي لحد ما لقيت عدد لا بأس به الحمد لله بيتابعني ما بين باستمراروبين الحين والآخر بس الحمد لله مرتاح جدا وسط حبايبي المدونين..

مين أحسن واحد بتحب تعليقاته على بوستاتك الجديدة؟

سؤال معجبنيش لإن في ناس كتير بأستنى تعليقاتهم بس أهم ناس المتابعين الاساسين للمدونة ..سنووايت – شهرزاد – رحيل – ياقوت – أليس في بلادي العجائب – روفي – أكون أو لا أكون – الريم – وكتير قوي من الناس الي جدوا على مدونتي والله مش بس الي ذكرتهم عشان محدش يزعل تقدروا تلفوا انتوا في المدونة والي تلاقوه مستمر في التعليقات بشكل دوري ده أكيد والله بأسعد بيه قوي ..

ايه أهم حاجة اتعلمتها من عالم التدوين؟

أكتر من حاجة..أولهم الصبر لإني بكون نفسي أحط بوست جديد بس مش عاوز أحرق الي قبله فلازم أستنى الناس تشوفه وتقراه وكده.. الحاجة التانية سعة الصدر عشان أحيانا الواحد بيلاقي تعليقات بيكون عاوز يضرب صاحبها لإنه لا قري ولا عمل وجي يشتم طب ده تعماه إيه..ولا لما تدخل مدونة تلاقي فيها سب لأئمة الدين والعلماء تعمل ايه يا ترد بحكمة يا تخرج بس ببأه متنرفز خاص.

حاسس إن التدوين له تأثير؟

في بدايته لأ مكانش ليه تأثير غير على المدونين نفسهم لكن دلوقتي لما الناس فهمت وعرفت خلاص باه محرك اساسي وزمتنفس كبير وطبعا الناس عرفت الحكاية وبأت تتابع مدونين كتير وتتاثر بيهم لدرجة إن قنوات الاخبار بقت تستعين بالمدونين السياسين زي وائل عباس مثلا مش قناة الجزيرة عملت معاه حوار ع الهاتف في حادثة حريق مجلس الشورى ده دليل على إن المدونات فعلا بدأت توصل لأهدافها مع غختلاف رسايلها..

تهدي التاج لمين..

دي مقدرش عليها عشان يمكن الي أهديهوله ميكونش عاوز مثلا أو يكون جاوب عليه لكن الي يشوف التاج ده ويوكن عاوز يجاوب عليه ده إهداء خاص مني له وياريت يقلي عشان اقرأ رده وإجاباته..

كده عملت الي عليا يا شهرزاد أي خدمة ..

شيء من داخلي

2008-09-15T15:39:00.000-07:00

أشعر بألم شديد يجتاح قلبي يحاول أن يسكنه رغما عني..لم تتركني..لم تخاصمني..لا ولم تجرح قلبي بكلمة واحدة لكني رأيت الفرحة في عينيها تلمع بدموع متخفية وراء ستار الخجل..نعم والله..حتى لا تسبب لي أي إحرجا..ربما أشعر بداخلي بفرق كبير بيني وبين ما حدث ولكنه القدر الذي لا يد لي فيه..اليوم كان خطبة أختها الأكبر بسنتين .. حكت لي عن كل ما جرى تحكي بسعادة غامرة لكنها مملؤة بالألم والتمني والبكاء على الحال من صميم القلب.. لم أعرف ماذا أفعل لم أستطع أن أصارحها أبدا أو أن أخفف عنها..هي رقيقة رقة شديدة إن حدثتها ستبكي لا محالة.. فماذا أفعل..أحبها بحق الله ولكن ليس بيدي حيلة في أهلها ولا بيدي حيلة برزقي خاصة وانا مازلت شابا في مقتبل عمره..هي تحبني بكل ما أوتيت من مشاعر وأحاسيس لا أسألها عن شيء تحبه أبدا إلا وتقول أحبك أنت..تصرفاتها حركاتها..إحساسها بكل شيء أفعله..دقات قلبها التي أسمعها على البعد الذي بيننا.. تحبني وأحبها حقا..

أكاد أموت قهرا وإختناقا من هذا الأمر ..حتى وإن كانت هي لم تدمع عيناها أو يتأثر فلبها فأنا أموت ألما وأتذوق العذاب والمرارة عندما أراها تتمنى قربي في كل لحظة وثانية ولا أستطيع فعل شيء لها سوى أن أصبرها وأربت بكلماتي الحانية على قلبها الرقيق..ياالله ..أريد أن أبكي حقا وربي أتمنى أن تتيح نفسي لي البكاء فأبكي وأبكي وأبكي ربما يريحني البكاء قليلا..ولكن هيهات وهي وحدها وأنا وحدي..هيهات أرتاح وحبيبتي بعيدة عني... سامح الله أباها الذي أطلق رصاصة رفضه لي من فمه فاخترقت قلبي وأصابت كل ما فيه..

اللهم كن معي فليس لي سواك..وأجمعني بها على الخير فليس للأمل طريق إلاك ..وارحم يارب أرواحنا التي تعلقت ببعضها فهي لا ترجو إلا رضاك وأن تقارب بينها في الحياة الدنيا وفي الآخرة ..واجمعنا اللهم في الدنيا سويا وفي القيامة مع حبيبك ومصطفاك..آمين يارب..وأسألكم الدعاء بصدق ونحن في ليالي رمضان المبارك..

من كل حتة كلمة

2008-09-10T16:08:00.000-07:00

حجات كتير جت في بالي واحنا في رمضان أتكلم عنها..خاصة إن ده أول رمضان لي في مصر وكمان أول رمضان يمر عليا وأنا بأحب ..حكاية الحياة في مصر حكاية طويلة ودوامة كبيرة..بس بجد حكاية حلوة قوي ..بمكن الواحد شايف حجات كتير سيئة وناس غلابة وفقرا ومحتاجين..وبلاوي زرقا بس والله العيشة في مصر رائعة وسط الروح الإجتماعية الي مستحيل تلاقيها في السعودية أبدا..أنا مش بأسيئ لأهل السعودية لا والله بس في في مصر راحة بال وقلب وروح.. أنا باه هتكلم عن نفسي في رمضان وفي مصر ومع حبيبتي..ثلاثة في واحد..

لما جيت مصر حبيت الخروج والروحة والجية عشان أعرف شوارع البلد وأتكشى فيها..حبيت النيل بطريقة فظيعة..بقيت أعشق المشي عليه ..ولا السوق وحكايته مهايا..مش لازم أنزل السوق عشان أشتري حاجة بس كفاية إن الواحد يتفرج على اصناف الناس ومعاملتهم لبعض والحواديت الي بتحصل في السوق أكيد طبعا عارفين.. هيال بتعيط وستات ماشية رايحة جيا وبياعين إيه موضة تانية..يمكن ده شكل السوق في كل الدنيا عيال وسنان وبياعين..بس احنا في مصر غير كل حاجة عندنا لها نكهة جميلة قوي..مش عشان أنا مصري والله بس هو ده احساسي بجد.. ولا لما رحت اسكندرية هناك بأه مقلكوش جو ايه وسحر ايه وحلاوة إيه..مشكلتها مناظر السياح إلي على البحر بس بلاوي زرقة وبيضة وخضرا وكل الألوان بجد حاجة تغيظ لما الواحد يشوف حاجة زي كده تحرق دمه..ومهما كان الواحد شاب بأه وفي ريعان شبابه لما يشوف منظر كده مثلا يعمل ايه..أنا عملت ايه بجد والله مشيت علطول مش بأكدب بس العبرة بأه في تداعيات ما بعد المشاهدة يعني الأفكار الي أعوذ بالله جت في بال الواحد والكلام الفارغ ده.. خلينا من اسكندرية ونروح القاهرة..كمان حلوة قوي..بس فيها حجات بردو معجبتنيش ..مثلا في دريم بارك حكاية..بلاش أدخل في تفاصيل بس معرفتش أتمتع فيها بسبب ما فيها من حجات انتو عارفينها كويس..

نيجي لرمضان..أنا هنا مستمتع برمضان بطريقة رهيبة وحاسس بجو رائع بس طبعا مش زي الروح الإيمانية العالية إلي في مدينة الرسول فرق كبير..ربنا يوعدكم بالعمرة والحج وزيارة الرسول.. بس مهما كان جو رمضان هنا تحفة..وحوي يا وحوي وحلو يا حلو.. ورمضان جانا وفوانيس رمضان صحيح مد إن شاينا يعني صنع في الصين بس يلا الواحد بيحاول يقنع نفسه إن ده فانوس.. وقت التراويح وبعدها..اللمة وقت المغرب.. حاجة ايه آخر حلاوة.. آجي لأخر نقطة وهي حبيبتي..طبعا المفروض كنت أبدأ بيها بس أنا قلت خليها للآخر..أنا طبعا بأكلمها وكل حاجة وتمام التمام الحمد لله بس العبرة إن مفيش لسا بينا ارتباط رسمي بس مامتها عارفة إني بأكلمها وعاملة مش واخدة بالها..يا ترى الواحد صيامه كده يبقى صح..خايف إنه يبقى بيبطل كده بس والله يارب مش بقول حاجة خارجة ولا أي شيء هما كلمتين باطمن عليها وتطمن عليا وخلاص وبعدين النية محلها القلب وانا والله ناوي والنية لله إنها تكون حلالي قريب جدا او يعني أشبكها قريب ومامتها وباباها مش معارضين بس لما أجمع فلوس الشبكة..ملاقيش مع حد منكم خمسين ألف جنيه ولا حتى تلاتين ويبقى فكلي أزمة العمر وأدعيلو لحد ما أموت.. عموما ربنا يتقبل مني ومنك وييسر لكل واحد فينا أمره ويحققله أمله وأمانة ادعولي ربنا يتملي موضوعي على خير.. رمضان كريم ومعلش كتبت هنا بالبلدي بس عشان الواحد جواه كلام عاوز يخرج ولسة منزل بوست على أوراق وأسرار فيعني كمان دي لها حق عليا خاصة إني من زمان مكتبتش عليها وأولا وأخيرا دي قهوة والدردشة فيها مسموحة بالفصحى أو بالعامية..معلش بأه لو كنت رغيت كتير وطولت عليكم.سحور مبارك وتصبحوا على ألف خير يارب

إعلانات الشروق

2008-09-10T11:59:00.001-07:00

متعودتش قبل كده إني أعمل في مدونتي إعلانات تجارية أو حجات أتربح بيها..بس وإيه إلي فيها خاصة لو كانت دي حاجة خاصة بيا أنا.. النهاردة بأه ده أول إعلان هانزله هنا..طبعا مش في مدونة كأني أتكلم لأني عاوزها تفضل متمسكة بقيمها التي أسست عليها..أدب وبس ..لكن إيه موضوع الإعلانات ده بأه يا جماعة.. أنا اللوقتي الحمد لله ربنا من عليا بكرمه وهشتغل في الدعاية والإعلان يعني إيه..يعني الي عاوز يعمل إعلان أيا كان نوعه وشكله وحجمه وكمية ألوانه ..يقولي وهأجيبله سعر رمزي جدا ومش مكلف.. نشرة إعلانية جديدة..اسمها الشروق..هتصدر عن وكالة الشروق للدعاية والإعلان عندنا هنا في المنصورة وطبعا أخوكو بيشتغل مع الي فيها..يعني أنا تقدرو تقولو بأشتغل حجات كتير.. صحفي شوية ومندوب إعلانات شوية وحجات كده يعني.. تخيلوا أسعار الإعلانات الشخصية رخيصة جدا جدا جدا..يعني لو واحد عاوز يبيع موبايله مثلا..أو واحد عاوز موبايل أو الي عنده أثاث بيت عاوز يبيعه أو جهاز كمبيوتر أو أي حاجة أي حاجة,, دلوقتي إعلانك المبوب في الشروق بخمسة جنيه بس يعني إنت مش خسران خالص خالص ..كل ما عليك تبعت صيغة الإعلان وكمان الخمسة جنيه والنشرة نصف شهرية هيطلع إعلانك في العدد الجاي علطول وبيفضل اسبوعين والنشرة بتتوزع على معظم محافظات مصر ..وبعد شهرين هتبقى بتتوزع في كل مصر وكمان هتكون أسبوعية..تخيل باه عشر آلاف نسخة من إعلان إنت عاوز الناس تقراه وبخمسة جنيه بس..أه والله بس وكمان البروشورات والإعلانات التانية ياربي حتى لو هتاخد صفحة كاملة وتصميمات وحجات كده وألوان مش هتكلفك حاجة..لإن أعلى سعر في الشروق لأي إعلان مهما كان حجمه وشكله وألوانه 250 جنيه بس ..يبقى تستنى ليه.. عليك وعلى الشروق للإعلانات..

إلي عاوز يعمل غعلانه أو يستفسر بوضوح يبعتلي على الإيميل ebrahem.aladawy@yahoo.com أو يكلمني على الموبايل بناعي في أي وقت وأنا موجود وإعلاناتكم من النهارده تقدرو تقولوا ببلاش..إيه يعني خمسة جنيه قدام عشرة آلاف نسخة من الإعلان.. بجد ولا حاجة خالص.. مستنيكم

حاجة غريبة قوي

2008-09-05T05:16:00.001-07:00

الواحد لما يكتب موضوع أو ينزل بوست على المدونة يعني بيكون في قمة السعادة لأنه بيفتح مجال للتواصل بينه وبينه الناس الي بيحبهم جدا..الناس الي هو اختار يكون واحد منهم..المدونين يعني..بس أكتر حاجة بقة تدايقني الأيام الاخيرة دي غياب الكتير جدا من المدونين عن مدوناتهم أو وجودهم البسيط جدا وطبعا الي بيخليهم يغيبوا عن مدونات غيرهم وميزوروهاش ولا يقروا الي الواحد تعب فيه عشان هما يلاقوا حاجة كويسة يقروها.. مثلا أنا هأتكلم عن نفسي بس محدش يقول إني مغرور أو شايف نفسي..أنا بعنب لما أجي أكتب حلقة من رواية بأكتبها على مدونتي كأني أتكلم أو قصة قصيرة أو حتى خاطرة أيام ما كنت بأنزل خواطر يعني ..بأكون في حرص شديد إن ميكونش فيها ابتذال أو معنى ملوش داعي أو حاجة تافهة عشان أنا بأقدر الي بيحترمني ويديني من وقته ..طبعا اللهم إلا الاخطاء المطبعية أثناء الكتابة عشان باكتب بسرعة مش باخد بالي منها..لكن بحق ربنا بأكتب الي أنا شايف إن محدش هيندم إنه ضيع فيه وقت..

من حقي أتكلم دلوقتي عن مدونتي كأني أتكلم ..أنا اللوقتي بأنزل حلقات رواية جديدة طبعا ممكن تكونوا شفتوها..اسمها أيام الوحدة..بأحكي فيها حكاية اجتماعية بروح سياسية في زمن حقيقي وأحداث حصلت فعلا اللهم إلا الأحداث الإجتماعية وحياة الناس دي من عندي لكن كل حدث سياسي حصل فعلا..يعني تقدروا تقولوا انها رواية يعني خيال وتاريخية يعني كان واقع وبقى مسجل على الورق..أنا كتبت الرواية دي من زمان من رمضان الي فات تقريبا..دلوقتي بأعملها تنقيح وإعادة كتابة للفصول بتاعتها وبانزلها في مدونتي كأني أتكلم..كانت طلعت في دماغي فكرة خاصة لما واحد دكتور بأحترمه جدا أشار عليا بكده..إني أعرضها على شركة إنتاج تلفزيوني أو مخرج يعني وتبقى مسلسل لإن أحداثها مترتبة متناسقة زي ما قال وتنفع ببساطة يتكتبلها السيناريو بتاعها وتبقى حلقات مسلسل رمضاني..طلعت الفكرة في دماغي وحلت قوي بس للأسف أنا معرفش حد من الشركات دي أو المخرجين دول والواحد يخاف يعرضها على حد ميعرفوش يروح من الآخر كده لو مسرقش النص منه هيسرق الفكرة وألف مين يكتبلوا حكاية ورواية وأبص ألاقي تعبي راح واتحرق..فقلت يا واد بلاش وخليها لوقتها...دلوقتي والسنادي مع بداية رومضان ده افتكرت الحكاية دي قلت طيب كويس والله تقديرا مني لزوار مدونتي وأصدقائها الكرام أنزلهالهم يقروها..عشان كده أنا عاوزكم تراعوا جهدي ده واهتمامي بيكم وبالذوق الي بأختاروا في قصصي وكتاباتي لكم وتتواصلوا معايا فيها بس بجد..إلي شايف حاجة معجبتوش..كده يعني الي لقى حاجة حلوة وعجبته..نقد يعني وكمان نورونا يا ناس مش كده..(هتقولوا بأشحت ع المدونة..)تقريبا بس مش قوي ما كل بياع بينادي علي عنده ولا ايه..أنا مش بأنزل بوستات كتير ع أوراق وأسرار أو حتى مقهى الثرثرة ليه..لإني مش عاوز أحرق كأني أتكلم لإنها حبيبة قلبي ومستحيل أستبدلها بغيرها..كفاية إسمها الي عاجبني قوي والحمد لله عاجب كتييير جدا من الناس ومنكم يا أصدقائي المدونين..

مستنيكم وياريت بأه محدش يغيب عن مدونته كتير ويقولي أجازة ومش عارف ايه القلم الي يكتب حبره ميخلصش..يعني الي بيحب الكتابة المفروض ميتوقفش عنها في اجازة ولا بتاع ولا ايه.. ربنا يكرمك ويتقبل صيامنا وصيامك.. رمضان كريم..وكل عام وأنتم بألف ألف خير..

تاج غالي

2008-08-22T20:52:00.001-07:00

جائني هذا التاج من السيدة طائر النار..بداية أعتذر لها عن التأخير..ولكن كان هذا لإنشغالي ليس إلا..ليس تطنيشا..

أبدأ بأه في التاج عشان شكلوا طويل ولازم يتحل بأه..نقول بسم الله..

1 – خمس أحلام على الأقل تخص ماضيك وتحلم فيها بتغير أشياء ماذا ستعدل وماذا ستترك ؟

- أن الأقصى يكون اتحرر ولو منت قدرت أشارك بروحي ومكنتش قلت لأ.

- أني مزعلش ربنا مني أبدا..ولا بابا وماما أبدا في حياتي ولا أخليهم يزعلوا مني ولو أدفع عمري تمن ده بس بعد ايه.

- اني مكونش سبب في جرح مشاعر ناس بعد ما علقتهم بي وسيبتهم ومشيت وربنا يستر وميكنوش بيدعوا علي اللوقتي.

- ان كل حلم اتمنيت يتحقق من كوني متفوق دراسيا أو عرفت أعملي مشروع يكسبني أو أو يكون اتحقق لو طبعا كنت قدرت أعمل حاجة مكنتش سكتت.

- مكنتش أتخيل في يوم إن إبراهيم بتاع النهارده ده هو بتاع أيام البراءة والطفولة..لو رجع بيا الزمن طبعا هأصلح نفسي أكتر وأغير في نفسي حجات كتير جدا..

2 – خمس أحلام تخص مستقبلك ؟

- نفسي ربنا يهديني وأبقى كويس في نظر نفسي مش الناس لإن الناس متعرفش خبايا روحي إيه ونفسي ربنت يهدي بيا ولو واحد بس.

-أسعد بابا وماما وإخواتي وأساعدهم بكل الي أقدر عليه وأسد ولو 1 في المية من الجميل الي علي خاصة الإضافي الغير ملزم بيه حد قدمهولي.

- أكون إعلامي ناجح ومعروف أنفع الإسلام وأكون خير من يبلغ الإسلام في العالم بره.

- يكون دخلي كويس قوي وأستخدمه في نفعي ونفع غيري ومحتاجش لحد أبدا إلا ربنا .

- يكون لي ملك شخصي عشان أساعد الناس وأسعدهم وأرضي طموحي وغروري الفطري

3 – شخصين متواجدين في حياتك كنت تود وجودهم قبل الآن ؟

- شخص بحبه في الله جدا لي جلسات معاه كده قراية قرآن وأحاديث وكده أسبوعيا اسمه الدكتور رامي دياب.

- وطبعا حبيبة قلب وأغلى شيء في حياتي ربنا يخليها لي ويكتبلنا الخير سوا ونقدر نصمد مع بعض لحد النهاية ..(ادعولنا ربنا ييسرلنا)

4 – شخصين غير متواجدين في حياتك وتود تواجدهم في حياة أولادك مستقبلا..

مفيش حد محدد بس لو كان السؤال ليا أنا مين الي كنت أتمنى وجوده في حياتي وهو مش موجود هيبقى.. الرسول عليه الصلاة والسلام طيعا.. وبهد كده جدي محمد رحمة الله عليه..

تهدي التاج لمين..

دي بأه شغلانة بس يلا نقول بسم الله..

أهديه لكل من .. ميرام و عايزة أتطلق – jody - esraa

معلش بأه لو كنت غلست عليكم بالتاج ده بس ده لإني عاوز أعرف عنكم أكتر..

يارب أكون وفيت بوعدي يا ستي ياطائر النار

أعمال الرابطة وبداية الحملة

2008-08-15T01:31:00.001-07:00

السادة الكرام الي الحمد لله انضموا لحملتنا العظيمة (ليكونوا حقا أحياء..) بحيكم والمرة دي بأه هأقولكم كل الي انتم عاوزينوا وهأطرح سؤال صغير وياريت تشاركوني في جوابه..

أول حاجة خالص ده ايميل الحملة quloobrhema@yahoo.com ياريت كل المشاركين يبعتولي عليه عشان أحدد بالظبط العدد ومين هيشاركنا ..عشان نحدد أول لقاء لينا هيكون امتى وازاي..

تاني شيئ بأه هنبدأ امتى.؟ الأسبوع ده بإذن الله..هنعمل ايه.. دي بقة في النقط دي..

1- هنتقابل ونحدد لجنة أمانة الرابطة (مسؤول الرابطة ونائبة – اللجنة الثقافية والتوعوية للرابطة – اللجنة الإعلامية والدعائية للرابطة – اللجنة التنفيذية للرابطة – الشؤون المالية للرابطة) وتوزيع الأدوار هيكون بالترشيح والإنتخاب.طبعا وهنحدد مقر الحملة الريسي والفرعي.وأعمال الحملة وحدة وحدة ونشوف المقترحات.

2- هنبدأ الحملة الإعلانية عن الرابطة عشان نجمع التبرعات ويفضل نبدأ بنفسنا ونجمع مننا الأول يعني لو احنا مية ولا أكتر شوية مش كتير علينا لما نجمع نقطة البداية المالية للحملة وهي 2000جنيه. وبعد كده في خلال الأيام الي قبل رمضان هنعمل الدعاية للرابطة في الشارع عشان الناس تساهم معانا ودي ليها فكرة حلو عندي عشان نتفادى الأمن والكلام ده.

3- تالت حاجة بأه اتنين من كل لجنة مع رئيس اللجنة هيكونوا هما لجنة تحديد الأطفال الي هنعمل لهم ده كله وطبعا الي عاوز يساعد من غير اللجنة دي يتفضل.. هنتفق مع دور أيتام وملاجئ وجمعيات خيرية ونحاول نحصل منهم على أطفال أو على الأقل يدلونا على الطريقة الي نحصل بيها على أطفال محتاجين مساعدة..

4- مع دخلة رمضان بأه هنبدأ العمل يعني كل الي فا تمهيد طبعا عشان نعرف الي لينا والي علينا..هنعمل ايه بأه للأطفال دي..ده بأه متوقف على آرائكم وواقتراحتكم واتفاقنا..بس مقدمل قبل كل شيئ اسم الحملة بيقول ليكونوا حقا أحياء يبقى لازم نأمنلهم الأكل والشرب بصورة مستمرة..اللبس الكويس كمان..وندرس حالتهم يعني نعرف هما كل واحد فيهم حكايته ايه وممكن نساعدو ازاي..

5- في حاجة كمان احنا مش بس هنساعد الأطفال دول..لا رمضان هيفتحنا كتير قوي على العوائل الفقيرة والمحتاجة كمان دول هنساعدهم.

6- يعني هنعمل خيمة زمضانية للحملة هتكون طبعا مرخصة ..ازاي دي بأه دي علي أنا هنستخدم اسم جمعية خيرية مرخصة انا لي علاقة بالناس فيها عشان يبقى شغلنا في السليم..

باقي نقطة وحدة بأه..لازم كل الي يشترك معانا يكون عارف ان ده لوجه الله يعني لازم يشتغل بإتقان وكمان يكون عارف انه محدش اترجاه يجي جي بإرادته يعني يسد بجد مش يجي يلعب..عشان نكون متفقين من الأول الحملة هتاخد مننا جهد لازم نكون قدو وكل الي يشارك يشارك بجد وكلنا تقع علينا المسؤولية وكلنا نتحاسب قدام مسؤول الحملة ومسؤول الحملة يتحاسب قدامنا محدش أحسن من حد..عاوزين أمانة وثقة وتطوع..جهد وإيمان ومعاملة حلوة..عاوزين نبقى إخوة وأصحاب ونجمع ايدينا ونعاهد ربنا ان كل واحد فينا هيعمل بإخلاص واتقان ..

ها يلا بقا راسلوني على ايميل الرابطة عشان نبدأ الأسبوع ده.. منتظركم ويارب متتأخروش

صوت الصمت

2008-08-13T09:40:00.000-07:00

عندما عرفتها..وجدت خيوطا تربطني بعالم الصمت الرهيب..حلقات وصل تفتح علي أبواب الوحدة والخلوة بالذات..ربما لأنها شغلت كل تفكيري وملأت علي حياتي..ربما لا أشعر بالوحدة ما دمت أحبها..ما أعيه اليوم أنها أصبحت جزءا لا يمكن أن ينفك بأي حال عني..جسد وروح وقلب..

لم تكن خيالا يترآى لي في المنام..لم يكن حلما في عقلي أن أحب فتاة..ربما تاقت نفسي مرات أن أتحدث إلى إحداهن أو أن يكون لي صداقة من عالم حواء..لكن العجيب في الأمر أنني عندما دخلت عالم حواء..دخلته عاشقا لإحدى فتياته ..

ليست قصة عجيبة .. لن أقول كما يقول الجميع عرفتها وكلمتها و..و.. ثم وجدت نفسي أحبها..لا ويشهد الله أني عرفتها وعرفت حبها في يوم واحد..ليس خيالا إنما شعور داخلي يقول أنها هي قدري..هي قسمتي..وجدت روحها هي أيضا تنجذب إلي..حاولت أن أخرج منها بكلام حتى أبني عليه أساسا لما أتصوره من علاقة جذبتني إليها دون سابق معرفة..لكنها كانت حريصة جدا..حيرتني في أمري..اضطررت أن أخبرها بمكنون قلبي..فقط بعد يومين من معرفتها..لم أجد لديها أي تعجب فيما أقول أو استغراب للموقف وعدم تصديق لكلامي..لم تقل لي تلك الكلمة(لم تعرفني سوى أياما قليلة)لا والله ..فوجئت بها تقول لي بعد حديث طويل أنها شعرت نفس شعوري هذا قبل أن أخبرها به..قالت لي..أقسم لك أني أحسست أني أحبك من أول يوم تحدثنا فيه سويا لكنني حاولت تكذيب نفسي وإيهام قلبي أنه إعجاب ليس إلا..واليوم كنت قد نويت أن أنهي الحديث بيننا إطلاقا حتى لا أشعر بتعلق أكبر وأكثر ويزداد عذابي بعد ذلك..قلت لها..حتى بعدما أخبرتك بما في قلبي..فردت لي ..لا بالطبع..

لا يمكن أن أصف مدى فرحتي يومها..

غيرتني تماما..وغيرت مسار حياتي..أن تكون السبب في أن أترك الغناء وسماعه هي أنثى..مع أن الفتيات ينجذبن للغناء أكثر منا نحن الشباب..أن تكون السبب في محافظتي على ورد القرآن اليومي وصلاة الفجر الجماعية هي أنثى..مع أنهن أقل منا قدرة على الإلتزام بشيء.. أن تكون أول أنثى أعرفها هي حبيبتي..كل ذلك يدعوني لوقفة مع نفسي.. وقفة لأسمع فيها صوت روحي في صمت ..أسمع فيها نداءات قلبي في سكوت..ألم ما تبعثر من أفكاري في هدوء..لأصل أخيرا إلى قناعة تامة..أن الحب يفعل كل شيء.. أن الحب أرقى المشاعر البشرية..أنه وحده الذي يغيرنا...وحده الذي يسيطر على عقولنا وأفعالنا.. لأصل قبل ذلك كله أننا لو كنا حقا نحب الله ورسوله حق المحبة لما فعلنا ما ينافي طاعتهما أو حتى يخالفها شيئا قليلا..

الحب عبادة قبل أن يكون حياة..الحب طاعة قبل أن يكون مودة وألفة.. الحب كنز من اكتسبه في دنياه بحق وعاشه في طاعة الله ..فاز به وبخير منه في أخراه يوم يلقى ربه..

هذا ما سمعته من حديث روحي في صدى الصمت..

حملة (من أجل أن يكونوا حقا أحياء)

2008-08-12T05:09:00.001-07:00

أطفال الشوارع ..كارثة للأسف مصر ليها فيها أكبر ناقة وأكبر جمل..عشان كده اقترحت إننا نعمل للخلق دي حاجة..تساعدهم وتعينهم..صحيح مش هنقدر نساعد الكل بس ع الأقل هنبدأ وبعد كده ممكن غيرنا وغيرنا وغيرنا يعملوا زينا أو يشاركو معانا..شعار العمل بتاعنا هيبقى بداية يعني وممكن يتغير لو اتفقنا على غيره (من أجل أن يكونوا حقا أحياء) لإنهم بجد مش حسين بالدنيا..

طبعا الموضوع مش عاوز شرح ولا استفاضة لإننا عارفين يعني ايه أطفال الشوارع عشان كده ندخل في تفاصيل المشروع ونتكل على الله ونقول خطوات العمل..

أولا عاوزين تكون الرابطة بتاعتنا على الأقل بداية 10 أشخاص..

الفكرة ايه..احنا هنعمل بحث صغير عشان نجمع عدد وليكن بداية 10 عشان نقدر نتحكم فيهم..

طبعا لازم يكون للرابطة صندوق مالي عشان نعرف نعمل حاجة وإلا هيبقى كلام على ورق..طيب الفلوس دي هتيجي منين..هو ده بأه الكلام لو عرفنا نعمل بروباجندا جامدا للحملة بتاعتنا ع المدونات ونبعت إيملات وحتى نكلم كل الي نعرفهم عشان نجمع تبرعات نساهم احنا كمان فيها ..أنا في خطتي ان التبرعات دي عشان تتجمع لازم نبدأ حملة الإعلانات فورا..في خلال شهر لازم نكون التقينا في اللقاء الأول للحملة بعد تحديد الأعضاء المساهمين والمفترض نكون جمعنا تبرعات خلال الشهر ..اللقاء يبقى أول ما نحدد المساهمين والي هيشتغلوا معانا..

هنعمل ايه باه للناس دي..هو ده السؤال التاني.. رمضان جي وبعدوا العيد..عشان كده عاوزين نضغط نفسنا ونعمل في وقت موجز الخطوتين الأولى الي هيا تجميع اعضاء الرابطة وتحديد الأطفال الي هنقوم بمساعدتهم

والتانية الي هيا تجميع التبرعات واللقاء سويا..

أول حاجة هنجيب لكل طفل هدوم طبعا..هنحاول نعملهم مشروع صغير على قد أعمارهم وسنهم بدل ما يناموا في الشوارع ويعيشوا طول النهار والليل فيها..أي حاجة تشغلهم يعني..طبعا هتقولوا طيب هينامو فين مش معقول في الشارع..احنا هنتفق مع جمعيات خيرية تساعدنا أنا عن نفسي أعرف جمعيتين عندنا في المنصورة ممكن يساعدونا..هنطلب منهم بس يدبرولهم مكان سكن واحنا هنتكفل بمصروفاتهم طبعا من التبرعات الي هنلمهالهم.. عاوزين نحسسهم إنهم ناس ممكن يعيشوا بعد ما الزمن وراهم الي بيشوفوه .. وفي العيد طبعا هنحسهم بفرحة العيد بكام حاجة كده نبقى نتفق عليهم سوا..

هيبقى هدفنا الأطفال دي بس لو حد ساهم مساهة كبيرة معانا ممكن نزود العدد بس بداية هيكونوا دول..طبعا العدد قليل اه بس لنتوا متتخيلوش الأجر الكبير جدا الي وراه والفرحة الي هتدخلوها لقلوب المساكين دول ولو حد منهم يتيم وده بيبقى كتير منهم كده يبقى زي ما الرسول قال ..أنا وكافل اليتيم كهاتين في الجنة وأشار بالسبابة والوسطى وفرق بينهما.. يعني خير قوي..ولو ربنا فتحها علينا في التبرعات قوي هنبقى نحدد لكل عضو في الرابطة مصروفاته الي بيستهلكها في خدمة الحملة عشان ميبقاش حد دفع حاجة من جيبه وفي نفس الوقت كسب ثواب..

ساهموا معانا نرسم البسمة على وشوش الأطفال دي..كتير منهم ميعرفش إن في حاجة اسمها جاتو ولا حتى يعرف يعني ايه فراخ ولحمة أهي كلمة بيسمعوها ولا عمرهم شافوها..

يارب تساهموا معانا وتشاركونا في الخير ده.. أساس الحملة دي اتنين أنا وصاحبة مدونة (مصر يا موكوسة يا مزارع الكوسة) جزاها الله خير هي أول حد حط ايدوا في ايدي.. مع بعض نخلي حياتهم لها معنى..

أنتظر مشاركاتكم ومساهماتكم.. الموضوع مش مكلف خالص غير شوية جهد متبخلوش بيهم على الأطفال دي ومتبخلوش على نفسكم بالأجر العظيم ده.. والي عاوز يستفسر عن حاجة انا جاهز

فضفضة(اقروا لحد الآخر)

2008-08-09T03:25:00.001-07:00

الحياة وسط الناس هنا في مصر حكاية.. حاجة تانية خالص تختلف تماما عن العيشة في السعودية مثلا..يعني بقول السعودية بصفتي متربي هناك ومولود كمان هناك..لما الواحد نزل واختلط بالناس في الشارع وخاصة بأه شغل الصحفيين ده خلاني أتعامل مع ناش أشكال وألوان..بقيت أمشي وسط الشوارع وأقول في نفسي أنا كده مصري.. هتستغربوا يمكن لو قلتلكم مع كتر المشاكل والكوارث الي الواحد بيشوفها كل يوم في بلدنا دي إلا إني بجد والله حبيت البلد دي قوي.. مصر يا سلام كان حلمي أعيش فيها..وأهو أنا عايش على أراضيها...

لما تلاقي الست العجوزة بتبيع مناديل بتشحت يعني م الآخر بس مكسوفة تقولك هات يابيه بدون ما تديك حاجة..انت تاخد وتسيب المناديل وتقول الله يحنن..لما تلاقي عربيات الفول هنا وهناك ..لما كل ما تمشي تلاقي خناقة تباعين ولا عسكري مرور خانق الشارع ولا ولا وحجات كتير..بجد تحس إنك في مصر.. مش عشان دي مبتحصلش إلا هنا لكن أهو..

حياتي هنا شكل تاني ..عاداتي اتغيرت مية في المية متعرفوش باه بس أنا عاوز أسأل سؤال..يا ترى رمضان هنا شكلو ايه..أنا مجربتوش أبدا هنا..أهو ع الأبواب ربنا يمد في عمرنا ونلحقوا هنا..ياترى جو رمضان هنا حلو.. بيقولوا أه ..

الحجات بأه الي واجهت الواحد هنا مثلا زي تعاملي مع البنات..مش من عادات السعودية كده خالص..لما جيت بأه حصل معايا شوية مواقف بس أنا كان عندي قابلية إني أندمج وأدوب في المجتمع بسرعة ..عرفت أعيش وسطهم مع مل الإتراضات الي واجهتني من أهلي وغيرهم..ومتكلمش دي ولا تقف مع دي وبنات الناس مش لعبة ومش عارف ايه..أنا لما بدأت الحياة هنا عارف أنا هأتصرف ازاي خاصة مع الجنس الناعم.. بجد الواحد لفى راحة كبيرة جدا لما بقت معارفو متنوعة يعني في الكلية والشارع والشغل والجيران وكل تعاملاتي أعرف فيها بنات ورجالة كمان يعني بس الغريب في الموضوع إني مش لاقي نفسي لحد اللوقتي غير في الشغل وبس يمكن بحس إنو بيلامسني جدا..

كنت فكرت في مجموعة حجات كده منها إني أعمل مشروع عبارة عن كفتريا صغيرة كده تجيب للواحد قرشين بدل الشغل البلوشي ده..أ مكتبة عند الكلية بردو تعملي قرشين حلوين بس ملقيتش الي يساعد أو يشاركني أو حتى يقف جمبي فيها..بصراحة أنا مقلتش قوي يعني بس أي مشروع من دول عاوز حد يدعمني فيه ويبقى شريك بالنص متعرفوش حد يرضى يشاركني وياخد الضمانات الي هو عاوزها تكسبوا في أجر لو ساعدتوني في كده..لو جد يعرف يقولي في التعليقات وأنا أديلو نمرتي ويبقى باب رزق وخير واتفتح ومش هنساكو طبعا الي عاوز يشتغل معايا أو يشاركني أنا موجود..

قبل ما أقفل الكلام باه.. كنت عاوز أعرض عليكم فكرة كده..إيه رأيكم نعمل لقاء بينا لقاء مدونين يعني لقاء للتعارف وكل واحد يشوف الناس الي بيزروه ويعلقولو بجد نفسي في كده زي ما تحبوا كل واحد يقول المكان الي يناسبوا والوقت الي عاوزو ونعمل تصويت والمكان الي يتصوت عليه أكتر نتقابل فيه في الوقت الي نتفق عليه ولكم علي عزومة محصلتش لو كان غدا أو عشا هتتبسطو جدا جدا..أنا بقول يكون في المنصورة هنا أو في القاهرة أو حتى اسكندرية لو حد عندو حاجة يقول وأنا مستنيكم..متنسونيش بأه..

يلا كلو يخش يعلق ويقول يا جماعة

سلام ومعلش النهاردة اسمحولي الكلام كان بلدي قوي

هكذا علمتني الحياة

2008-08-05T09:30:00.002-07:00

حياتما نكهات مختلفة كل يوم يذيقنا طعما جديدا .نشم منه رائحة مختلفة..إما أن تكون مسكا خالصا أو تكون خبثا خالصا أو مخلوطا بشيئ من الطيب..ليس كل الألوان أبيض وأسود..لا بد أن يأتي شيئ ما يعكر صفوها.. هكذا هي الحياة..علمتني دوما أن أكون كما تسير هي لا كما أشاء أنا..أن أكيف نفسي مع الواقع وأعتاده لا أن أسايره دون رضا.. أن أكون قوي العزيمة والإرادة ..محكم البنية والميان كي لا أضيع في صرخات أمواجها العاتية ..

لست شيئا خارقا للعادة..لأست أديبا بارعا..أو كاتبا متفننا..لست إلا مسطرا لخواطر في نفسي.. أحاديث الروح هي أهازيج تمتزج بخيال عقلي فأصوغها كما يشتهي لساني وتكتي يدي..لا أتكلف يوما لأخرج عبارة رصينة أو جملة بليغة..ٌد علمتني الحياة أن السهولة أيسر من البحث عن الصعاب..أن الصعاب حتما قادمة في أمر آخر فلا أجعلها في كل شيئ..

أحببت الأدب وفنونه..التاريخ وسطوره..الصحافة وإجرامها..القلم ورسالته..فكنت كما رأيتم كاتبا مصريا ..ليس به ما يميزه عن غيره كثيرا.. حقيقة أقولها.. هكذا علمتني الحياة دوما أن أكون..